अवरुद्ध जयपृथ्वी राजमार्ग खुल्यो तर बस निकाल्न सकिएन

धनगढीबाट बझाङ आउँदै गरेको कर्णाली रिभर यातायातको बस सडक डिलमा अड्किएर अवरुद्ध भएको जयपृथ्वी राजमार्ग सडक भित्तातिर खनेर सुचारु गरिएको हो ।  आज बिहान भएको दुर्घटनामा सडकबाट चिप्लिएर ना ४ ख १९८३ नम्बरको बस भीरमा अड्केको छ । 'बस तेस्रो भएर अड्किएका कारण बिहान केहीबेर राजमार्ऊ अवरुद्ध भएको थियो । अहिले जेसिबी प्रयोग गरेर खुलाएका छौ । बस बोडाका कारण अड्किएकाले तत्काल निकाल्न सकेका छैन । विभिन्न साधन स्रोत लगाएर निकाल्ने प्रयास भइरहेको छ ।,'प्रमुख जिल्ला अधिकारी नारायण पाण्डेले भने ।

उहाँका अनुसार इन्जिनका केही पार्टस र बोडीका कारण मात्रै बस अड्किएको र तल भीर भएकाले निकाल्न असहज भइरहेको छ ।

बझाङको जयपृथ्वी नगरपालिका-७ सुबेडाको चौठ्या खोलामा उक्त दुर्घटना भएको हो । बसमा २२ जना यात्रु सवार थिए । बीच सडकमा तेर्सो परेर बस अड्किएका कारण जयपृथ्वी राजमार्ग अवरुद्ध भएको थियो । बसको पट्टा भाँच्चिएर अनियन्त्रित हुन पुगेको तर मानवीय क्षति भने नभएको सुदूरपश्चिम यातायातका काउन्टर इन्चार्ज जीवन खड्काले बताए ।

अहिले बस निकाल्ने प्रयास भइरहेको छ । चौठ्या खोलामा आउने बाढीले बगाएर ल्याएको ढुङ्गामाटो व्यवस्थित नगर्दा सो दुर्घटना भएको स्थानीयकाे अनुमान छ । खोलामा आएको बाढी सडकमा जाने गरेको र ढुङ्गामाटो थुप्रिँदा सडक बिग्रेको स्थानीय दिपकराज जोशीले बताए ।