भारतमा कोरोना संक्रमणबाट बझाङका तीन जनाको मृत्यु 

बझाङ : भारतमा सुरु भएको कोरोना महामारीको दोस्रो लहरले तीन जना बझाङी नागरिकको ज्यान लिएको छ । ज्यान गुमाउनेमा वित्थडचिरका एक जना, थलाराका एक जना र केदारस्युँका एक जना रहेका छन् । 

वैशाख ८ गते कोरोना संक्रमण देखिएका थलारा -४ ठिङका ३९ वर्षिय प्रेम नेपालीले वैशाख ११ गते भारतको आन्द्रामा ज्यान गुमाए । यस्तै एक हप्ताअघि कोरोना संक्रमण पुष्टि भएका बिथडचिर गाउँपालिका–७ सुनकुडा सुवाकोटका ५२ वर्षीय जंगबहादुर अधिकारीले भारतको नयाँ दिल्लीमा वैशाख १४ गते राति ९ बजे ज्यान गुमाए । 

यता लामो समयदेखि भारतमा बस्दै आएका केदारस्युँ १ चाैडामका करिब ५३ वर्षिय रलु पार्कीले पनि वैशाख १५ गते बैङ्लोरमा कोरोनाकै ज्यान गुमाए । उनलाई पनि एक हप्ता अगाडीदेखि कोरोना देखिएको थियो । यी एक हप्तामा आफन्तको सम्पर्कमा रहेका मात्रै अझैं एक्लै बसिरहेकाहरु सम्पर्कमा नआएको पनि हुनसक्ने अनुमान रहेको बैङ्लोरबाट राजेश रावलले बताए । 

अहिले कोरोनाको दोस्रो लहर सुरु भएसँगै सबैभन्दा भारत नराम्रोसँग प्रभावित बनेको छ । भारतको राजधानी दिल्लीमा शव जलाउनका लागि घाटको अभाव भएको छ । कोरोना सङ्क्रमणका कारण ज्यान गुमाउनेको सङ्ख्या बढेपछि दिल्लीमा घाटको अभाव भएको बीबीसीले जनाएको छ ।

दिल्लीका सबै घाट २४ सै घण्टा चलाउँदा पनि दाहसंस्कारका लागि घण्टौँ पर्खनुपर्ने भएपछि दिल्ली प्रहरीका अधिकारीले घाटका लागि नयाँ ठाउँ खोज्न सरकारसँग माग गरेका छन् । उपचारका लागि शय्या र अक्सिजन खोज्नुपर्ने तथा मृत्युपछि घाट पाउन मुस्किल भएपछि प्रहरी अधिकारीले थप घाटको व्यवस्था गर्न आग्रह गरेका बीबीसीले जनाएको छ ।

भारतमा पछिल्लो २४ घण्टामा तीन लाख ८६ हजार चार सय ५२ जनामा कोरोना सङ्क्रमण पुष्टि भएकाे छ । याे अहिलेसम्म कुनै पनि देशमा एकै दिन पुष्टि भएको सङ्क्रमितको सबैभन्दा ठूलो सङ्ख्या हो ।