चैनपुरमा आगलागी हुँदा एक फेन्सी पसल जलेर नष्ट, दमकल आगो नियन्त्रणमा लिइसकेपछि आयो

बझाङ सदरमुकाम चैनपुरमा आगलागी हुँदा एक फेन्सी पसल जलेर नष्ट भएको छ । चैनपुरस्थित प्रशासन रोडमा रहेको कैलाश फेन्सी पसलमा आज बिहान ३ बजेर विद्युत सर्ट भइ आगलागी भएको हो । आगलागीबाट पसलभित्र रहेका करिब एक करोड बढीका सामान जलेर नष्ट भएको सञ्चालक डबल खड्काले बताउनुभयो ।

निन्द्रामा भएकाले आगलागी भएको ढिलो गरि थाहा पाउँदा पसलभित्रको सामान जलेर नष्ट भइसकेको पसलका सञ्चालक खड्काको भनाई छ । थाहा पाउनसाथ स्थानीय मिलेर आगो नियन्त्रणमा लिएको आरजे मोबाइल ग्यालरीका सञ्चालक जनकराज धामीले बताउनुभयो ।

दुई घण्टा बित्दा पनि नगरपालिकाको दमकल नआएको व्यापारीहरुको गुनासो छ । आगलागीबाट भने कुनै मानवीय क्षति नभएको स्थानीयबासीले जनाएका छन् ।

पसल सञ्चालक अर्को घरमा बस्ने भएकाले राती ३ बजेको समयमा स्थानीयले आगो लागेको देखेर पसल सञ्चालकलाई खबर गरेका थिए ।