अवरुद्ध जयपृथ्वी राजमार्ग खुलाउन बाग्थलाबाट मेसिन मगाइयो, दिउँसोतिर सुचारु हुने सम्भावना

अविरल वर्षाका कारण पहिरो गएपछि जयपृथ्वी राजमार्ग अवरुद्ध भएको छ । हिजो आइतवार दिउँसो बैतडीको पाटन नगरपालिका–८ विजयपुर र झ्याउलेकको बीच भागमा सडक माथिबाट ठूलो ढुङ्गा खस्दा राजमार्ग अवरुद्ध भएको हो । 

ढुङ्गा फुटाउन बझाङबाट मेसिन मगाइएको जिल्ला प्रहरी कार्यालय बैतडीका प्रहरी निरीक्षक खेमविक्रम केसीले जानकारी दिनुभयो  ।  उहाँले भन्नुभयो, 'ठूलो ढुङ्गा फुटाउन नसक्दा गाडी बीच बाटोमै रोकिएका छन् । केहीबेर मेसिन पुगेपछि सडक खुल्नेछ ।'

आइतबार दिउँसोदेखि यो राजमार्ग अवरुद्ध हुँदा बझाङबाट बाहिरिने र बझाङ जाने ठूला गाडी रोकिएका छन् । यद्यपी साना सवारीसाधन जीप र मोटरसाइकल भने चलिरहेका छन् । राजमार्ग अवरुद्ध भएर गाडी रोकिँदा यात्रु अलपत्र परेका छन् । अलपत्र यात्रुहरुले गयराति खोड्पेका विभिन्न होटेलमा रात काट्न बाध्य भएका थिए । शनिबारदेखिको अविरल वर्षाका कारण बाढी र पहिरोको जोखिम बढेको छ ।