दुईवटा जेसिबी परिचालन हुँदा पनि जयपृथ्वी राजमार्ग सडक खुलेन, बिहानैदेखि यात्रु अलपत्र

आज दिनभर जसो जयपृथ्वी राजमार्ग अवरुद्ध बनेको छ । खोड्पे नजिकै दुइ यात्रु बाहक बस ठोक्किदा र पाटन नगरपालिका ८ झ्याउलेकमा पहिरो खसेर जयपृथ्वी राजमार्ग अवरुद्ध बनेको हो । खोड्पे नजिक रहेको हरिहर प्लाजा नजिक खप्तड मालिका बस सडक सतह चिप्लो भएका कारण चिप्लिएर सुदूरपश्चिम यातायातको बसमा ठोक्किदा दुई घण्टा अवरुद्ध हुन पुगेको थियो ।

बसहरु ठोक्किए पनि यात्रु र चालकको अवस्था भने सकुशल रहेको त्यहाँबाट थलारा -४ का यात्रु मदन साउँदले बताउनुभयो । यस्तै जयपृथ्वी राजमार्ग अन्तर्गत बैतडीको पाटन नगरपालिका ८ झ्याउलेकमा सडकमाथिबाट खसेको पहिरोले दिनभर जयपृथ्वी राजमार्ग अवरुद्ध गरेको छ । साना सवारी साधन मोटरसाइकल र जीप पास भए पनि यात्रुबाहक बसलाई असहज हुँदा दिनभर यात्रुहरु अलपत्र परेका हुन् ।

दिनभर एक्लै खटिएको जेसिवीले सडक खुलाउन नसकिएपछि अहिले दुईवटा जेसिबी परिचालन गरि सडक खुलाउने प्रयास भइरहेको जिल्ला प्रहरी कार्यालय बैतडीका सुचना अधिकारी योगेश खत्रीले बताउनुभयो । यस्तै काठमाडौंबाट बझाङ आउँदै गरेकी अन्तिमा खड्काले दुईवटा जेसीबी सडक खुलाउन प्रयासरत रहे पनि सडकमा खसेको ठूलो ढुङ्गा हल्लाउन नसकिएको हुँदा कतिखेर खुल्ने भन्ने यकिन गर्न नसकिने अवस्था छ ।

 सडक अवरुद्ध हुँदा काठमाडौं, धनगढी र महेन्‍द्रनगरबाट दिवा सेवाका लागि छुटेका बस र बझाङबाट धनगढी काठमाडौं र महेन्द्रनगरका लागि छुटेका बसहरु झ्याउलेकमा रोकिदा यात्रुहरु अलपत्र परेका छन् ।