५० औं डिएसपीका रुपमा नयाँ डिएसपी शाह बझाङ आउँदै

नेपाल प्रहरी प्रधान कार्यालयले नेपाल प्रहरीका ४८ जना एसपी (प्रहरी उपरीक्षक)हरू र १२० जना डीएसपी ( नायव प्रहरी उपरीक्षक)हरूको सरुवा गरेकोे छ । सरुवा गरेसँगै सुदूरपश्चिमका सबै जिल्लाका उपरीक्षकहरू तथा प्रहरी नायव उपरीक्षकहरूको पनि सरुवा भएको छ।

प्रहरी महानिरीक्षक (आईजीपी) वसन्त कुँवरले शुक्रबार गरेको निणर्यअनुसार एसपी र डीएसपीको सरुवा गरेका हुन् । २०८० सालको भाद्र महिना देखिको तलब, भत्ता, समेत हाल सरुवा भएको दरवन्दीबाट खान पाउने गरी एसपी र डीएसपीको सरुवा गरीएको हो। 

सरुवा भएको ठाउँमा नयाँ व्यक्तिलाई पठाएको छ । जिल्ला प्रहरी कार्यालय बझाङमा कार्यरत प्रहरी नायव उपरिक्षक जागेश्वरी भण्डारीलाई केन्द्रिय अनुसन्धान ब्युरो महाराजगंज काठमाडौंमा सरुवा गरिएको छ भने उहाँको ठाउँमा जिल्ला प्रहरी परिसर काठमाण्डौँ शान्ति सुरक्षा तथा प्रहरी कार्य शाखामा कार्यरत भरत बहादुर शाह बझाङ्गमा सरुवा भएर आउनुहुने भएको छ । 

गत २०७९ श्रावण २० गते सरुवा भइ बझाङ्ग आउनुभएका डिएसपी भण्डारी बझाङका लागि ४९ औं डिएसपी हुनुहुन्छ भने सरुवा भइ आउने नयाँ डिएसपी शाह ५० औं हुनुहुन्छ । बुधबार अर्थात भदौ २० गते डिएसपी भण्डारी बझाङबाट औपचारिक रुपमा बिदा हुने कार्यक्रम रहेको जिल्ला प्रहरी कार्यालय बझाङले जनाएको छ ।