एसिया कप क्रिकेटमा आज भारत-पाकिस्तानको ‘हाइभोल्टेज’ खेल हुँदै

१६औँ संस्करणको एसिया कप एकदिवसीय क्रिकेट प्रतियोगितामा आज दुई चिरपरिचित प्रतिद्वन्द्वी भारत र पाकिस्तान भिड्दैछन् । यी दुई टोलीबीचको ‘हाइभोल्टेज’ प्रतिस्पर्धा दिउँसो ३:१५ देखि श्रीलंकाको पालेकेले क्रिकेट स्टेडियममा सुरु हुनेछ । 

पाकिस्तान र भारतबीचको खेलमा कडा प्रतिस्पर्धा हुने अनुमान गरिएको छ । भारत रोहित शर्मा र पाकिस्तान बाबर आजमको कप्तानीमा मैदान उत्रनेछन् । 

समूह ‘ए’ मा रहेको पाकिस्तान लगातार दोस्रो जितको खोजीमा छ । उसले पहिलो खेलमा खेलमा नेपाललाई २ सय ३८ रनले हराएको थियो । भारत भने पहिलो खेल खेल्दैछ । ऊ पाकिस्तानलाई हराउँदै विजयी सुरुवात गर्न चाहन्छ ।

भारत र पाकिस्तानले आन्तरिक राजनीतिको कारण सन् २०१३ पछि सिरिज खेलेका छैनन् । एसिया कप र विश्वकपमा मात्रै यी दुई देशले प्रतिस्पर्धा गर्दै आएका छन् । जसकारण पनि भारत–पाकिस्तानबीचको खेललाई थप महत्वका साथ हेर्ने गरिन्छ ।

अहिलेसम्म यी दुई टिमबीच ५० ओभरको एसिया कपमा कुल १३ खेल भएका छन् । जसमा भारतले ७ र पाकिस्तानले ५ खेल जितेको छ । पछिल्लो पाँच ओडिआई भेटमा भारत चार र पाकिस्तान एक खेलमा विजयी भएको थियो ।

हालसम्म भारतले सातपटक र पाकिस्तानले दुईपटक एसिया कप उपाधि जितेको छ ।