पुगरलेकस्थित मष्टा मन्दिरमा धुमधामका साथ भैंसी पूर्णीमा मनाइयो, महिलाहरुले श्रद्धापूर्वक घण्ट चढाए

जयपृथ्वी नगरपालिका वडा नम्बर २, ३ र ४ का बासिन्दाले आज पर्यटकिय स्थल पुगरस्थित मष्टा मन्दिरमा धुमधामका साथ भैंसी पूर्णीमा मनाएका छन् । पुगरको टुप्पोमा अवस्थित मष्टा मन्दिरमा मष्टा देवतालाई आआफ्नो गक्ष अनुसार दान, भेटी र बली दिएर भैंसी पूर्णीमा मनाएका हुन् ।

यसलाई यहाँका बासिन्दा भैंसीको पूजा गर्ने दिनका रुपमा सम्झने भएकाले भैंसी पूर्णिमा भनिएको मन्दिरका पूजारी कछी जोशीले बताउनुभयो । उहाँका अनुसार परापूर्वकालमा आफ्रेगडामा गोठालाले चराउन छोडेका भैंसी दानवले दय तालमा कब्जा गरेको र दानवलाई मष्टा देवता चलेर खेदेको हुँदा हरेक वर्ष भदौको जनै पूर्णीका दिन भैंसी पूर्णीमा मनाउन थालिएको हो । यस दिन मष्टा मन्दिरमा पूजा गर्दा मष्टा देवताले प्रसन्न भइ यहाँका स्थानीयका भैंसी फल्ने धार्मिक विश्वास रहेको छ ।

यसैबीच आज जयपृथ्वी नगरपालिका ३ का महिलाहरुले मष्‍टा मन्दिरमा घण्ट चढाएका छन् । आज जयपृथ्वी नगरपालिका वडा नम्बर ३ का महिलाहरुले सदरमुकाम चैनपुर बजारमा जम्मा भइ बाजागाजाकासाथ चाभाइ र मागल गाउँदै पुगरलेकस्थित मष्टा मन्दिरमा चढाएका हुन् ।