विद्यार्थीलाई देखिएको समस्यालाई बुझ्न हिडेको डाक्टरको टोली साइपाल पुग्यो

धलौन माध्यमिक विद्यालय साइपाल- १ का विद्यार्थीलाई देखिएको समस्यालाई बुझ्न चैनपुरबाट हिडेको वरिष्ठ मानसिक रोग विशेषज्ञ डाक्टरको टोली धलौन पुगेको छ । साइपाल गाउँपालिका उपाध्यक्ष डोल्मा लामा तामाङ, निमित्त प्रमुख प्रशासकिय अधिकृत राधाकृष्ण जोशी र डाक्टरसहितको टोली सोमबार धलौन पुगेको छ । 

साइपालको धलौन माध्यमिक बिद्यालय र अन्य बिद्यालयका छात्राहरुमा रुने, कराउने लगायतको समस्या देखिन थालेपछि काठमाडौं मानसिक रोग विशेषज्ञ डाक्टरहरुको टोली जिल्लामा पुगेको थियो । असारको तेस्रो साताबाट छात्राहरुमा टाउको दुख्ने, खुट्टा झमझम हुने, रुने, कराउने र बेहोस हुने समस्या देखिएपछि स्वास्थ्यकर्मीहरुले मास हिस्टेरियाको लक्षण रहेको बताएको थियो । 

यो समस्या रोकथाम तथा नियन्त्रणका लागि वरिष्ठ मानसिक रोग विशेषज्ञ डाक्टर निराजन भट्टराइ र वरिष्ठ आयुर्बेद चिकित्सक डा खगेन्द्र बम सहितको टोली काठमाडौंबाट चैनपुर हुँदै साइपाल पुगेको छ। समस्या देखिएका विद्यालयमा भोलीदेखि उपचार तथा परामर्श गर्ने त्यहाँबाट टोलीसँगै सहभागी पत्रकार रमेश सिंहले बताउनुभयो । उहाँका अनुसार डाक्टरहरुको टोली केही दिन साइपालमै बसेर पिडित विद्यार्थी, सम्बन्धित विद्यालयका शिक्षक, विद्यालय व्यवस्थापन समिति र अभिभावकसँग परामर्श गर्नेछन् । धलौन माध्यमिक विद्यालयका छात्राहरु कक्षाकोठामै बेहोस भएर ढल्न थालेपछि पठन पाठनसमेत प्रभावित भएको छ ।