बझाङमा फाइबर पुन: ब्रेक, ठेकेदार कम्पनी सम्पर्क बिहीन हुँदा सुधार गर्न ढिलाई

फाइबर ब्रेक हुँदा पुन: बझाङमा नेपाल टेलिकमको फोन र इन्टरनेट सेवा प्रभावित भएको छ । नेपाल टेलिकमको डडेल्धुराबाट बझाङ जोडिएको फाइबर लाइन अन्तर्गत खोड्पेदेखि झलाल्लाबीचको फाइबर पुन: ब्रेक हुँदा सेवा प्रभावित भएको हो ।

पानी परेर विद्युत पोल ढल्दा फाइबर ब्रेक भएको नेपाल टेलिकम बझाङ शाखाले केही समय अगाडी सुधार गरेपनि पुन: बढी क्षति हुँदा यहाँका प्राविधिकले सुधार गर्न नसक्ने अवस्था सृर्जना भएको छ । 

फाइबर ब्रेक हुँदा बझाङमा फोन गर्दा आवाज नसुनिने, काटिएर आउने र इन्टरनेट सेवा नचल्ने समस्या देखिएको छ । डडेल्धुराबाट बझाङ जोडिएको फाइबर लाइन सानो विद्युत पोल र लामो दुरी भएका कारण बर्खामा पहिरो जाने पोल ढल्ने र हिउँदमा तन्किएर फाइबर ब्रेक हुने समस्या दोहोरिरहेको नेपाल टेलिकम बझाङ शाखा प्रमुख बमबहादुर सिंहले बताउनुभयो ।

अहिले नेपाल टेलिकमलाई फाइबर लाइन विस्तार गर्ने कम्पनीले हस्तान्तरण गरेका कारण नेपाल टेलिकम र ठेकदारबीच कुरा बाँझिदा ढिलाइ भइरहेको छ ।

ठेकेदारले ब्रेक भएको फाइबर जोडिदिनु पर्ने टेलिकमको भनाई छ भने फाइबर लाइन विस्तार गर्ने ठेकेदार कम्पनी हाल सम्पर्क बिहीन अवस्थामा रहेको टेलिकम शाखा बझाङका कर्मचारी कैलाश यादवको भनाई छ ।