डोटीमा जिल्ला समन्वयको गाडी दुर्घटना हुँदा एकको मृत्यु, चालकसहित तीन घाइते

 डाेटिमा भएको जिप दुर्घटनामा एकको मृत्यु भएको छ । तीन जना घाइते छन् ।

बुधवार साँझ डोटीको आदर्श गाउपालिका २ मौवास्थित भित्री सडक खण्डमा दुर्घटना भएको हो । मौवा देखि सायलतर्फ जाँदै गरेको जिप दुर्घटना भएको थियो ।

आदर्श गाउपालिका १ बस्ने बर्ष ४२ का बिर बहादुर खड्काले चलाएको बा १ झ ९४३९ नम्बरको जिल्ला समन्वय समिति डोटीको जिप अचानक अनियन्त्रित भई सडकबाट करिब ५ मिटर तल खसेको प्रहरीले जनाएको छ । 

उक्त गाडीमा सवार आदर्श गाउपालिका १ बस्ने बर्ष ६५ की हिरा खड्काको घट्नास्थलमा मृत्यु भएको छ भने चालक सहित सोही ठाउका टेक बहादुर तिरुवा र रबिन्द्र सुनार घाईते छन् ।

उनीहरूको मौवा स्वाथ्य चौकीमा उपचार भईरहेको छ । घटना भएको सूचना प्राप्त हुनासाथ प्रहरी टोली खटिई  उद्वार गर्नुका साथै थप अनुसन्धान भईरहेको जनाइएको छ ।