परिवर्तनशिल बाल क्लबको अगुवाइमा पाण्डु माविमा गरियो वृक्षारोपण

परिवर्तनशिल बाल क्लब जयपृथ्वी नगरपालिका -३ पडेशको आयोजनामा आज वृक्षारोपण गरिएको छ । क्लबले आज जयपृथ्वी नगरपालिका -३ पडेशस्थित पाण्डु मावि पडेशको प्राङ्गणमा वृक्षारोपण गरेको हो । क्लबले बैस, पिपल र फूल प्रजातिका विभिन्न बोटविरुवाको वृक्षारोपण गरेको हो । 

क्लबले वृक्षारोपण गर्दा विद्यालयको वातारण सफा हुने र वनजंगल जोगाउनुपर्छ भन्ने सन्देश जाने बताएको छ । क्लबकी अध्यक्ष अन्तिमा खड्काले भनिन्,  'वृक्षले मानव र मानवले वृक्षको संरक्षण पनि प्राचीनकालदेखि नै गर्दै आएको हो । जन्मदेखि मृत्युसम्म मानव जीवनलाई सार्थक तुल्याउन वृक्ष चाहिन्छ । जन्मेपछि शिशुलाई ताप दिन दाउरा चाहिन्छ भने मृत्युपछि पनि लास जलाउन यही दाउराको आवश्यकता हुन्छ । यसैगरी बाँचुन्जेल चाहिने अक्सिजन पनि यही वृक्षले प्रदान गर्दछ । वृक्षले कार्वन भण्डारणदेखि भूसंरक्षणसम्मका कार्यहरु गर्दछ ।'

क्लबकी अध्यक्ष अन्तिमा खड्काको अगुवाइमा गरिएको वृक्षारोपण कार्यक्रममा प्रमुख अतिथि जयपृथ्वी नगरपालिका वडा नम्बर ३ का वडाध्यक्ष तथा पाण्डु मावि पडेशका विद्यालय व्यवस्थापन समिति अध्यक्ष गंग खड्का रहनु भएको थियो भने विशिष्ट अतिथि पाण्डु माविका निमित्त प्रधानाध्यापक जन्मजय जोशी रहनुभएको थियो । कार्यक्रममा भर्खरै एसइइ दिएका र अध्ययनरत विद्यार्थीहरुको पनि सहभागिता रहेको थियो ।

विगतमा पनि विभिन्न समाज सेवा मूलक काम गर्दै आएको परिवर्तनशिल बाल क्लवले समाजव परिवर्तनमा महत्वपूर्ण भूमिका खेल्दै आएको छ । 

 यस्तै अतिथिहरु पाण्डु माविका शिक्षक नारायण सोती, प्रेमराज जोशी, उत्तम साउँद र पडेशका युवा समाजसेवी पवन खड्का रहनुभएको थियो ।