छबिसपाथिभेरा गाउँपालिकाले पनि ल्यायो नयाँ एम्बुलेन्स

छबिसपाथिभेरा गाउँपालिकाले पनि पालिकाका बिरामीको सहजताका लागि एम्बुलेन्स ल्याएको छ । गाउँपालिकाले खरिद गरि ल्याएको एम्बुलेन्स धनगढी आइपुगेको र केही दिनमै बझाङ पुग्ने पालिकाले जनाएको छ । 

नेपाल सरकारको ५० प्रतिशत अनुदान र गाउँपालिकाकाको २० लाख बढीको लागतमा एम्बुलेन्स पालिकामा भित्रिन लागेको गाउँपालिका अध्यक्ष बसन्त बहादुर चलाउनेले बताउनुभयो । सदरमुकाम चैनपुर तथा जिल्ला अस्पतालबाट विमुख रहेको छबिसपाथिभेराका केही वडा निकै दुर्गम भएकाले सुत्केरी विरामीहरु उपचार सेवा सहजै नपाउने अवस्था छ । 

एम्बुलेन्स आएपछि अब पालिकाभित्र सुत्केरी, बिरामीले उपचार सेवा पाउन सहज हुने अध्यक्ष चलाउनेको भनाई छ । केही समय अगाडी थलारा गाउँपालिकाले पनि एम्बुलेन्स खरिद गरि ल्याएको थियो ।

बझाङका पालिकालाई सुदूरपश्चिम सरकारले दिएका एम्बुलेन्समा समस्या देखिएपछि विकल्पका रुपमा नयाँ एम्बुलेन्स खरिदमा ध्यान जान थालेको छ ।