बझाङ मन्त्री सवार जीप दुर्घटना : घाइतेको उद्दारका लागि सुर्खेतबाट हेलिकप्टर उड्यो 

बझाङमा सुदूरपश्चिम सरकारका मन्त्री सवार जीप दुर्घटनामा परेको छ । सुदूरपश्चिम सरकारका आन्तरिक मामिला तथा कानुनमन्त्री पृथ्वीबहादुर सिंह सवार सुपप्र ०१००१ झ ४८० नम्बरको जीप डडेल्धुराबाट चैनपुर आउने क्रममा केदारस्युँ गाउँपालिकाको धारछडा भन्ने स्थानमा दुर्घटनामा परेको हो।

दुर्घटनामा परेर मन्त्री पृथ्वीबहादुर सिंह, मन्त्री सिंहकी पत्नी अमृता सिंह, चालक धर्मराज जोशी, जयदेवी सिंह (महिला) र मन्त्रीका पिएसओ प्रहरी सहायक हवल्दार दिपक भण्डारी घाइते भएका छन् ।

घाइतेमध्ये मन्त्री पृथ्वीबहादुर सिंह, मन्त्री सिंहकी पत्नी अमृता सिंह र जयदेवी सिंहको अवस्था गम्भीर रहेको छ । घाइतेको थप उपचारका लागि सुर्खेतबाट हेलिकप्टर उडेको प्रहरिले जनाएको छ । 

डडेलधुराबाट चैनपुर आउने क्रममा केदारस्युँ गाउँपालिकाको धारछडा भन्ने ठाउँमा सडकबाट अन्दाजी ५० मिटर तल कालंगा खोला किनारमा खसेको हो ।