बझाङमा यार्सागुम्बा संकलन गर्न गएका थप एक जना पुरुषको मृत्यु

 बझाङमा यार्सागुम्बा संकलन गर्नका लागि हिमाली क्षेत्रमा गएका थप एक जना पुरुषको मृत्यु भएको छ । जिल्लाको सुर्मा गाउँपालिका वडा नं. ४ बस्ने अन्दाजी ४५ वर्षीय प्रमु बोहराको मंगलबार यार्चागुम्बा संकलनका क्रममा अत्यधिक हिमपात र पानी परेपछि घर आउने बेला चिसोले कठ्यांग्रीएर बाटोमै मृत्यु भएको हो ।

बोहरा यार्सागुम्बा संकलन गर्न चुफी वनतिर गएका थिए । चुफी वनबाट मंगलबार हिमपात परिरहेको बेला घर फर्किदै गर्दा तितापानी भन्ने स्थानमा चिसोले कठ्यांग्रीएर ज्यान गएको स्थानीयले बताएका छन् ।  उनको मृत्यु भएको खबर प्राप्त भएको र यस विषयमा थप अनुसन्धार भइरहेको जिल्ला प्रहरी कार्यालय बझाङले जनाएको छ ।  

यस अघि पनि सोमबार मात्रै सुर्मा गाउँपालिकाकै वडा नं ५ सैन गाउँका ३३ वर्षिय कलक बोहराको चिसोले कठ्याग्रीएर ज्यान गएको थियो । यस्तै मंगलबार नै सुर्मा गाउँपालिकाकै ३३ वर्षीया झल्लादेवि बोहरा हिमपहिरोमा परेर वेपत्ता भएकी छन् । उनको खोजी कार्य जारी रहेको प्रहरीले जनाएको छ ।