दुर्गाथली गाउँपालिकाभित्र निर्माण भइरहेका र निर्माण सम्पन्न भएका योजनाको अनुगमन 

दुर्गाथली गाउँपालिकाभित्र निर्माण भइरहेका र निर्माण सम्पन्न भएका योजना तथा कार्यक्रमहरुको सोमबार अनुगमन गरिएको छ । दुर्गाथली गाउँपालिकाका जनप्रतिनिधि, कर्मचारी तथा सरोकारवालाहरुले सोमबार आर्थिक वर्ष २०७९।०८०मा बजेट विनियोजन भइ निर्माण भइरहेका र निर्माण सम्पन्न भएका कार्यक्रम तथा योजनाहरुको अनुगमन गरेका हुन् । 

दुर्गाथली गाउँपालिकाका अध्यक्ष दिलबहादुर थापा, गाउँपालिका उपाध्यक्ष जनक बहादुर दौल्याल, प्रमुख प्रशासकीय अधिकृत देवीप्रसाद जोशी, तथा विभिन्न वडाका वडाध्यक्षहरुद्धारा दुर्गाथली गाउँपालिका वडा नं. ५ र ७ मा निर्माणको चरणमा रहेका योजनाहरुको अनुगमन गरिएको हो ।

दुर्गाथली गाउँपालिका वडा न. ५ को वडा कार्यालयको भवन, बासुधारादेखी गनखोलासम्मको ढल निकासी, जिवजेनी खानेपानी, कण्टधारी देखी चमलासम्मको आरसीसी बाटो, विसौनाचौर मेसिनरी वाल, गैरा क्रिया घर निर्माण लगाएतका योजनाहरुको सोमबार अनुगमन गरिएको हो । 

अनुगमनका क्रममा विभिन्न योजनाहरुमा कमसल सामाग्री प्रयोग गरी निर्माण थालिएको तथा सिमेन्टको प्रयोग गर्ने ठाँउमा माटोको प्रयोग गरिएको लगाएतका विभिन्न त्रुटीहरु भेटिएको र गल्तिहरुलाई तुरुन्तै सच्याउन पनि निर्देशन दिइएको गाउँपालिका अध्यक्ष दिलबहादुर थापाले बताउनुभयो ।