तलकोट गाउँपालिकामा सञ्चालित दुईदिने बृहत स्वास्थ्य शिविरमा एक हजार जनाले सेवा लिए

तलकोट गाउँपालिकामा सञ्चालित दुईदिने बृहत एकीकृत स्वास्थ्य शिविर सम्पन्न भएको छ । तलकोट गाउँपालिका वडा नम्बर ५ को दुर्गा भवानी माविको प्राङ्गणमा शुक्रबारबाट शुरु भएको शिविर शनिबार सम्पन्न भएको हो। तलकोट गाउँपालिकाका र गुराँसे कल्याणकारी सेवा समिति र रोटरी क्लब अफ नक्साल शक्तिको संयुक्त आयोजनामा उक्त बृहत शिविर सञ्चालन भएको हो ।

शिविरबाट विभिन्न प्रकारका पालिका भित्रका ९४० जना बिरामीहरु लाभान्वित भएको गाउँपालिकाले जनाएको छ ।शिविरमा नाक, कान, घाँटी रोग विशेषज्ञ, डेन्टल विशेषज्ञ, स्त्रीरोग विशेषज्ञ, जनरल फिजिसियन, हाडजोर्नी सम्बन्धि रोग विशेषज्ञ डाक्टरले सेवा प्रदान गरेका थिए ।  स्थानीय सरकारको पहलमा पहिलो पटक घर आगनमै विशेषज्ञसहित स्वास्थ्य शिविर ल्याएको भन्दै स्थानीयहरु खुशी भएका छन् ।

शिविरले तलकोटी जनतालाई थोरै भए पनि राहत भएको र गरिब,दुखी जनताले सहजै सेवा पाएको तलकोट गाउँपालिकी उपाध्यक्ष पार्वती कुँवर भण्डारीले बताउनुभयो ।  उहाँले आफ्नो र राष्ट्रपति विद्यादेवी भण्डारीको पहलमा यो शिविर घर आँगनमै ल्याउन सफल भएको र यसैगरी सबै निकायलाई सहयोग गर्न पनि आग्रह गर्नुभयो।