बझाङमा २ वर्षीया बालिका बलात्कृतको आरोप,  बालिकाको स्वाव ल्याब परिक्षणका लागि काठमाडौं पठाइयो

बझाङको खप्तडछान्ना गाउँपालिका वडा नम्बर–७ का एक ६८ वर्षीय पुरुषलाई २ वर्षीया बालिकामाथि बलात्कारको आरोप लागेको छ । ती पुरुषविरुद्ध बलात्कार गरेको भन्दै बालिकाकी आमाले प्रहरीमा आइतबार जाहेरी दिएकी छन् । 

फागुन १२ गते साँझ पाँच बजेतिर आफू घरबाट डेढ सय मिटर टाढा रहेको धारामा भाँडा धुन गएका बेला बालिकाको बलात्कार भएको उनले बताएकी छिन् । आफू भाँडा धोएर घर फर्किंदा घरमा छोरीलाई काखमा राखेर बलात्कार गरिरहेको र छोरी चिच्याइरहेकी देखेको र छोरीलाई बल्लतल्ल तानेर भाग्न सफल भएको उनको भनाई छ । 

घटना हुनेबित्तिकै स्थानीयलाई खबर गर्दा पीडक पक्षले गाउँमै घटना मिलाउन दबाब दिएको पनि उनले बताइन् । जिल्ला प्रहरी कार्यालयका प्रवक्ता प्रहरी निरीक्षक रमेश अवस्थीले बालिका बलात्कारको मुद्दा दर्ता भइसकेको बताए । उनले बालिकाको स्वास्थ्य परीक्षण गर्दा गुप्तांगमा घर्षण भएको पाइएको बताए । बालिकाको स्वाव ल्याब परिक्षणका लागि काठमाडौं पठाइएको र अभियुक्तलाई पक्राउ गरि मंगलबार म्याद थपका लागि जिल्ला अदालत पेश गरिने निरिक्षक अवस्थीले बताए । 

बालिकाकी आमा र बालिका अहिले सदरमुकामस्थित अल्पकालिन महिला सुरक्षा आवास गृहको संरक्षणमा छन् । अभियुक्त पुरुष पीडित बालिकाकै नातेदार पर्ने प्रहरीले जनाएको छ ।