बालुवाटारलाई जिल्लाकै नमुना खेल मैदान बनाउन पहल गर्ने अध्यक्ष चलाउनेको भनाई

छबिसपाथिभेरा गाउँपालिका वडा नम्बर १ मा रहेको बालुवाटार बगरलाई जिल्लाकै खेल मैदान बनाउन पहल गर्ने छबिसपाथिभेरा गाउँपालिका अध्यक्ष बसन्त चलाउने बताउनुभएको छ ।

उहाँले जयपृथ्वी राजमार्ग नजिक रहेको र पायक पर्ने ठूलो ठाउँ खेर गइरहेकाले त्यसलाई जिल्लाकै नमुना खेल मैदान बनाउनका लागि पहल गर्ने बताउनुभयो । बझाङमा २०५७ र २०७८ सालमा आएको बाढीले उक्त ठाउँ बगरमा परिणत गरेको थियो ।

बालुवाटारमा माटो र बालुवा रहेकाले सेतीतिर आरसीसी पर्खाल मात्रै पनि निर्माण गर्न सके जिल्लाकै नमुना खेल मैदान बन्ने उहाँको दाबी छ । आफू अध्यक्ष हुनुअघि पनि यो विषय चाँसोको रुपमा लिएको र अहिले सुदूरपश्चिम प्रदेश सरकारका सभामुख भिम भण्डारीसँग खेल मैदान निर्माणका लागि पहल गरिरहेको उहाँले बताउनुभयो । 

यस ठाउँमा खेल मैदान बने संरचना निर्माण गर्न सहज हुने र सबैको पायक पर्ने हुँदा खेलकुदका गतिविधि गर्न सजिलो हुने परिङ्गालका स्थानीय रामभक्त गिरीले बताउनुभयो । बझाङमा हाल खेल मैदान नहुँदा विद्यालय प्राङ्गण, दुरदराजका खुल्ला चौर, सडक र खेतमा खेलकुद गतिविधि गर्नु परिरहेको छ ।

अहिले बझाङ जिल्लामा राष्ट्रपति रनिङ शिल्ड अन्तर्गत पालिका स्तरिय रनिङ शिल्ड सत्यवादी माविको खेल मैदानमा भइरहे पनि सत्यवादी माविको पढाइ प्रभावित हुँदै आएको छ ।