बुङगल नगरपालिकामा लैङ्गिक हिंसा विरुद्ध सचेतनामूलक डेउडा तथा वक्तृत्वकला प्रतियोगिता सम्पन्न 

बझाङ:- बुङगल नगरपालिकामा पालिका स्तरीय लैङ्गिक हिंसा विरुद्ध सचेतनामूलक डेउडा प्रतियोगिता तथा वक्तत्विकला प्रतियोगिता सम्पन्न भएको छ । सामाजिक विकास कार्यालय बझाङ सँगको साझेदारीमा बुङगल नगरपालिकाको महिला शाखाको आयोजनामा कार्यक्रम बुङगल नगरपालिका वडा नं ४ विजगडामा कार्यक्रम सञ्चालन गरिएको थियो । लैङ्गिक हिंसा विरुद्धको १६ दिने अभियान अन्तर्गत लैङ्गिक हिंसा विरुद्ध पालिका भित्रका माध्यमिक तह स्तरको वक्तृत्वकला र चेतनामुलक डेउडा प्रतियोगिता बिहीबार सम्पन्न भएको छ । 

वक्तृत्वकला प्रतियोगितामा नगरपालिकाका ९ वटा विद्यालयले भाग लिएका थिए । चन्द्र मा.वि गिरौँ, महेन्द्र मा.वि गैरी ज्यावन, रत्न मा.वि खोल्लेक, सरस्वती मा.वि विजगडा, सत्य मा.वि तोलीचौर, कन्या मा.वि बटुल सेरा, शिव मा.वि पुतली लेक, शारदा मा.वि सैनोडी र कफलसेरी मा.वि कफलसेरी सहभागी भएका थिए । उक्त वक्तृत्वकला प्रतियोगितामा चन्द्र मा.वि गिरौँ प्रथम, कन्या मा.वि बटुल सेरा द्धितिय, शारदा मा.वि सैनोडी तृतीय र सरस्वती मा.वि विजगडाले सान्त्वना हासिल गरेका छन् । कार्यक्रममा तीन वटा महिला समूहले डेउडा प्रदर्शन गरेका छन् । दलित सहयोग समाजले पनि कार्यक्रममा लैङ्गिक हिंसा सम्बन्धी सडक नाटक पनि प्रदर्शन गरेको छ ।

कार्यक्रममा बोल्दै नगरप्रमुख जय बहादुर धामीले लैङ्गिक हिंसा न्यूनीकरण गर्दै सभ्य समाज निमार्णमा सबैको भूमिका उत्तिकै रहेको बताउनु भयो । समाजमा महिला हिंसाका घटना धेरै भए पनि कानुनी उपचारका लागी अझै पनि खुल्न नसकेको र बढी जसो श्रीमानले श्रीमती माथि हिंसा गर्ने गरेको पाइएको छ । सानै उमेरमा बिहे हुने गरेका कारण विवाह दर्ता नहुने र विवाह दर्ता नभई नागरिकता बनाउन नमिल्ने भएका कारण हिंसा पीडितले न्याय खोज्न सकस हुने गरेको धामीको भनाई थियो । समाजमा बढी जसो घरेलु हिंसाका घटना देखिने गरेकोमा आगामी दिनमा कुनै पनि हिंसा भए गरेको सुन्न र देख्नु नपर्ने गरी लाग्न सबैलाई अनुरोध समेत गर्नुभयो ।